12 dicembri 1985 (poesia)
12 dicembri 1985 (lingua siciliana - vernacolo messinese)
12 dicembri 1985
( a Graziella Campagna vittima della mafia)
Ciuri inviulatu, 'dda sira avii sulu dicissett'anni
quannu du' omini sdisonurati, cu tanti inganni,
ti purtaru 'nta 'ddu spirdutu "Furtinu Campuni"
pì 'mmazzariti senza pietati e senza indicisiuni.
Cusapi supra a 'dda machina quantu avisti a grirari
vidennu ca 'a via versu casa nun annava a jittari.
Sutta 'na pioggia infinita, longu 'na strata stirrata,
luntanu 'i uocchi canusciuti e sutta 'na luci vilata,
cincu corpa 'i lupara li 'nfami ti spararu
e pì nun aviri dubbii cu fari sicuru miraru.
Tu vulivi scappari comu 'na farfadda,
ti curperu brazzu, pettu, panza e spadda.
L'urtimu fu 'ntâ testa, pì sicurizza
d'aviri eliminatu 'u prublema cu cirtizza!
Avisti sulu 'a curpa, anima 'nnuccenti,
stirannu 'ntô travagghiu cu mani sapienti,
'i vìdiri 'u libbriceddu 'ill'ingegneri Cannata
e pì chistu fusti a morti cunnannata.
T'attruvaru dopu du' iorna 'i scuru
cu 'nu brazzu 'mpuiatu contra 'nu muru.
Eri na carusa china 'i spiranzi e 'i vita
muristi pâ lorda e niura manu dâ malavita.
Cu 'mbrogghi, mucciatini e diviazzioni
circaru 'i cummogghiari 'a to' esecuzzioni.
Ma 'a famigghia, to' frati Petru 'u carrabbineri,
mai si persiru d'animu circannu sempri cu misteri
'i dariti 'dda giustizzia ca miritavi e nun 'ddu scempiu,
pirchì 'i certu 'a to' morti fussi pì tutti d'esempiu.
Fusti vittima dâ mafia, gigghiu jancu,
uora riposa 'ntâ paci cu l'autri ianciuli a fiancu.
Pubblicazioni
Premi
2023 Concorso internazionale di poesia “MEMORIAL DOTT. SALVATORE DAVI’ 2022”, organizzato dall’Associazione Culturale Billeci