‘A scurata

di Santina Paradiso

'A scurata


Na’ sponda di l’anticu χumi vaju avanti
fasturnata lassu ‘i pinseri pisanti
cumu cuticchia a munziddu ammassati
di l’acqua e d’u timpu ammulati
mentre l’ummira d’a fimmarìja
a picca a picca crea scurìja
e cumu neglia accubbusa
cala ncapu ‘i salici e ‘i budi, tinibrusa
tra canni e cannedda, petri e pitruzzi
mentre ‘i passariddi chiudunu l’aluzzi
e s’aggiuccanu ne’ rami spiddicinati
di betulli, faggi e chiuppi spugliati
vicchi ricurdi, memoria luntana
che sdigliummariju cumu filu di lana
curadda di prizijusa collana.
Ripinsu ô timpu ca passa senza pietà
‘mpiccicatu n’a faccia, a signari l’età
e fa ‘i cunta tra rimorsi e rimpianti
stocca ‘i rini, ma si va ancora avanti.
Come junciu rispunta ‘u sintimintu
e lava ni l’arma rancuri e risintimintu
sustinutu da lu timpu ca li feriti sana
e tuttu sistema e tuttu appiana.
Riviju ‘u ma’ timpu già a lu scurari
‘i fogli caduti n-terra pronti a siccari
è l’autunnu ca lassa l’arma ferita
‘ni ‘sta malincunusa stasciuni di la vita.
L’arvulu si spoglia di virdi speranza
nudu e nnurutu avverte la mancanza
d’u fogliami cadutu lintu lintu
e offri ‘i so’rami ô friddu e ô vintu.




                        

Premi

2023 Premio Internazionale di Letteratura "Antonio De Francesco" - Vita Via Est