Vittima ‘nnuccenti
Vittima ‘nnuccenti
Senza mi nni manciu o mi nni bivu
mi ‘mmazzaru, nun ni sacciu ‘u mutivu.
Ma jo chi ci trasia ‘nta 'ḍḍa buffetta?
Caminava pâ me’ strata senza fretta.
Nu briganti armatu ‘i scupetta
sparau cu mira assai ‘mperfetta.
Du’ corpa ci tirau ô mafiusu,
ma unu di chisti annau pi jusu,
cu forza battiu ‘n-terra, diviau rittu,
pigghiannumi ‘n-frunti ‘ntô so’ tragittu.
‘Mmiscai ‘n-terra comun na pira sfatta
‘u sangu mi schicciau a la ‘ntrasatta.
Nun ebbi mancu tempu ‘i diri piu
o d‘addumannarici pirdonu a Diu.
Mentri ‘u mafiuso, pi culu, si sarvava
l’autru, ‘u curnutu, lestu lestu scappava.
Pi curpa ‘i nu malidittu distinu
finiu ‘a vita ‘i nu onestu cittadinu.
'Ḍḍu sicariu, vinutu pi dinaru,
fici cchiù dannu dû cincu ‘i frivaru,
'ḍḍu iornu ci fu sulamenti nu mortu,
lassai na famigghia ‘nta lu sconfortu.
Tinia na mugghieri e tri figghi cu vantu,
ora mi cianciunu casa e campusantu.
Chi tinta simenza tiniva 'stu briganti
supra ‘a cuscienza ‘i morti n’avia tanti.
Pajatu ‘ill’ “onorata società”
‘mmazzava i cristiani senza pietà.
Scrissiru st’epitaffiu supra ‘a me’ balata:
“Muriu ‘nnuccenti pi manu armata.”
Ma jo nun mi dugnu affattu pi vintu,
nun s’incontranu mai sulu li munti.
‘U spettu ô varcu a 'st’infamuni,
ava a veniri ô funnu dû vaḍḍuni.
Di certu li sicari 'sta fini fannu,
nu iornu puru a iḍḍu ‘mmazzirannu.
Nu favuri ci limosinu ô Patreternu,
prima ‘i mannarlu ‘nta lu ‘nfernu
e farici soffriri i cchiù tinti patimenti,
pirchì si merita sulu duluri e chianti:
m' 'u lassassi menz’ura ‘nta na stanza
pirchì cu nu nerbu, senza crianza,
c’aju a dari na passata ‘i corpa cu firocità
ca si l’ava a ricurdari... pi tutta l’eternità.
Pubblicazioni
Premi
2023 premio letterario "Uniti per la legalità - Memorial Salvatore Barbaro", vittima innocente della camorra.